URamaphosa usephefumulile ngezinsolo ezivezwe uMkhwanazi

LINDOKUHLE NGCOBO 

UMENGAMELI wakuleli uMnuz Cyril Ramaphosa, uthi bonke abathinteka emacaleni enkohlakalo kumele babhekane nengalo yomthetho. 

URamaphosa uveze lokhu ngesikhathi ekhuluma nabezindaba izolo, njengoba ehambele ingqungquthela iBRICS, eBrazil. Kulandela ukubuzwa ngezinsolo ezivezwe uKhomishana wamaphoyisa KwaZulu-Natal uLt-General Nhlanhla Mkhwanazi, azibhekise kuNgqongqoshe wamaphoyisa uMnuz Senzo Mchunu nePhini likaKhomishana kuzwelonke uLt Shadrack Sibiya. 

UMkhwanazi uthe uMchunu uphazamisa ukusebenza kwengalo yomthetho, uvikela izigebengu eziphenywa ngokubulawa kosopolitiki. Udalule  ukuthi uMchunu usezame kaningi ukuthi kubenokuthula phakathi kwakhe(Lt-General Mkhwanazi) noSibiya, njengoba kuvele ukuthi wake wabiza nomhlangano owabasemzini kaMchunu osePitoli. 

"Akusoze kwabanokuthula phakathi kwephoyisa nesigebengu," kubeka uMkhwanazi echaza uSibiya njengesigebengu. 

UMengameli kulindeleke ukuthi abhekana nalolu daba ngokugcwele uma esebuya kuleli.