OWEBAFANA UXWAYISA NGAMANDLA E-SOUTH KOREA

LINDOKUHLE NGCOBO

Umqeqeshi weBafana Bafana uHugo Broos, uvume ngaphandle kokungabaza ukuthi iqembu lakhe(iBafana) libhekene nomsebenzi onzima njengoba lizodlala neSouth Korea.

Lo mdlalo wokugcina esigabeni samaqoqo weNdebe Yomhlaba uzodlalelwa e-Estadio BBVA, eGuadalupe, eMexico, ngoLwesine ngehora lesi-3:00 ekuseni ngesikhathi saseNingizimu Afrika. I-Bafana ihlezi endaweni yesine ngephuzu elilodwa kuGroup A, iSouth Korea ihlezi endaweni yesibili ngamaphuzu amathathu.

UBroos uchaze iSouth Korea njengeqembu elibekezelayo nelingapheli amandla.

“Abadlali baseSouth Korea banjengamabhethri ohlobo iDuracell, bayagijima umdlalo wonke. Amaqembu ase-Asia ahlelekile futhi ayingozi kakhulu uma ehlasela. Kufanele sizimisele ngokugcwele.” kusho uBroos ngesikhathi ekhuluma ngamalungiselelo.

Nakuba evuma ukuthi kuzoba nzima, uBroos ukholwa ukuthi iBafana ingawunqoba lo mdlalo uma ingaqhubeka ngendlela edlale ngayo ngesikhathi ibhekene neCzechia.

IBafana idinga ukunqoba ukuze iqhubekele phambili emqhudelwaneni. UBroos ugcizelele ukuthi ngeke bathembele emiphumeleni yeminye imidlalo.

“Asinakubala amanye amaqembu. Kumele singene enkundleni sizele ukunqoba kuphela,” kubeka uBroos.