OWE-SUNDOWNS UKHALE NGOBUDEDENGU BEBANJWA I-STELLIES

UMQEQESHI weMamelodi Sundowns FC uMiguel Cardoso ukhale ngobudedengu kwabadlali bakhe, ngemuva kokulahla amaphuzu amabili, bebambane(Sundowns) ngo 1-1  neStellenbosch FC, emdlalweni weBetway Premiership eLoftus Versfeld Stadium, ePitoli izolo.

AMasandawana aye kulo mdlalo ngenhloso yokubuyela esicongweni selogi, njengoba uTsiki Ntsabeleng esheshe washayela leli qembu laseChloorkop igoli ngomzuzu ka-29. Nokho amaStellies akwazile ukubuya kulo mdlalo ngesikhathi ethola iphenathi, ngemuva kokuthi uKhulumani Ndamane edlalise kabi uChumani Butsaka,  uTshegofatso Mabasa wayibeka phakathi ngomzuzu ka-85. 

"Sibebudedengu, sibebudedengu kakhulu ngendlela esithathe ngayo lo mdlalo. Sinikeze ebesidlala(Stellenbosch) nabo iphenathi. Kumele sizigxeke thina ngokungawunqobi lo mdlalo. Yebo ungumdlali(Khulumani) osemncane kusamele aqonde indlela yokuziphatha. Ngaphambi kwephenathi uke wadlala ngokuzingeni eliphezulu kulo mdlalo," kubeka uCardoso ngemuva kwalo mdlalo.

I-Sundowns ihlezi endaweni yesibili kwilogi ngamaphuzu angu 57, emdlalweni engu 24, ngeSonto izovakashela iRichards Bay FC,  eMhlathuze Sports Complex,  eRichards Bay.

I-Stellenbosch ihlezi endaweni yesi 9 ngamaphuzu angu 32 emdlalweni engu 25, ngeSonto izovakashela iPolokwane City FC,  e-Old Peter Mokaba Stadium, ePolokwane.