OWE-PIRATES NGAPHANSI KWENGCINDEZI EHLULWA IGALLANTS

LINDOKUHLE NGCOBO 

UNGAPHANSI kwengcindezi umqeqeshi we-Orlando Pirates u-Abdeslam Ouaddou kulandela ukushaywa iMarumo Gallants  ngo 2-1 emdlalweni weBetway Premiership,  eDr Molemela Stadium , eBloemfontein namuhla ebusuku.

 Amabhakabhaka iwona ashaye igoli kuqala ngonyawo lukaPatrick Maswanganyi ngomzuzu ka 16, nokuthe sekuzophela isiwombe sokuqala uDaniel Msendani washayela iGallants igoli lokulinganisa ngomzuzu ka 45. UJaisen Clifford ushayele isikipili sokugcina ebhakuzisa inethi ngomzuzu ka 92+2.

Ngemuva kwalo mdlalo u-Ouddou obebonakala ebusweni ukuthi uphoxekile, njengoba bekunzima ngisho ukuphawula ngalo mdlalo. Lo mqeqeshi udalule ukuthi  ubenenhloso yokunqoba lo mdlalo.

"Sizobuyela emuva siyohlaziyiza kahle umdlalo, sibone ukuthi yini engahambi kahle ikakhulukazi isiwombe sesibili," kubeka u-Ouaddou.

I-Pirates ibihlulwa okwesibili emdlalweni weligi, njengoba ivule ngenduku ngoMgqibelo ihlulwa iSekhukhune United ngo 1-0.  

Kweminye imiphumela yemidlalo yanamuhla iMamelodi Sundowns ishaye AmaZulu fc ngo 2-0 eLoftus Stadium, ePitoli kwathi i- Orbit College yathela othuli iSiwelele ngo 1-0 eDobsonville Stadium,  eGoli.

NgoMgqibelo Amabhakabhaka azobhekana neMamelodi Sundowns emdlalweni womlenze wokuqala kowandulela owamanqamu weMTN8.