OWE-BAY AKAFUNI UKUFAKELA ABADLALI INGCINDEZI NGE-PIRATES

UMQEQESHI weRichards Bay FC uPapi Zothwane uthi akafuni ukufakela abadlali bakhe ingcindezi nge-Orlando Pirates FC. UZothwane uveze lokhu namuhla ngaphambi komdlalo weBetway Premiership ozoba phakathi kwePirates neNatal Rich Boyz e-Orlando Amstel Arena, eSoweto kusasa.

I-Bay iya kulo mdlalo ihambela kuphezulu, ngemuva kokushaya iKaizer Chiefs ngo 1-0, ngesonto eledlule eMhlathuze Sports Complex, eRichards Bay. 

"Angifuni ukuthi sizifake ngaphansi kwengcindezi. Sibhekana nomdlalo ngamunye, wonke umdlalo esiwudlalayo, sidlalela ukunqoba. Nakusasa sizodlala ngokuzimisela," kubeka uZothwane. 

I-Natal Rich Boyz ihlezi endaweni yesi 9 kwilogi, ngamaphuzu angu 23 emdlalweni engu 19.