KWETHULWE NGOKUSEMTHETHWENI KWABEZINDABA I-AFRICA’S TRAVEL INDABA 2026

Nonkululeko Msimango 

Namuhla kwethulwe i-Africa’s Travel Indaba 2026 eNelson Mandela Terminal. Lomcimbi bewuhanjelwe izikhulu zikahulumeni nabezimboni zezokuvakasha.

Umcimbi ubuholwa uNgqongqoshe WezokuVakasha kuZwelonke, uPatricia De Lille, ophethe inqubomgomo kazwelonke yezokuvakasha nokukhuthaza izivakashi zangaphandle. Ethula inkulumo uthe lo mcimbi ubalulekile ekwakheni amathuba omsebenzi nasekukhuleni komnotho nasekukhuliseni imboni yezokuvakasha.

UCyril Xaba, onguMeya woMkhandlu iTheku, uthe ukusingathwa kwalo mcimbi kungase kube nomthelela emnothweni wendawo, ikakhulukazi emabhizinisini asebenzisana nezivakashi.

Kuphinde kwaba khona uRev Musa Zondi, onguMEC obhekele ezokuThuthukiswa koMnotho, ezokuVakasha neMvelo esifundazweni. Ucaphune ukubaluleka kokubambisana phakathi kukahulumeni, amabhizinisi nemiphakathi ekuthuthukiseni imboni.

Lo mcimbi ububanjwe ngaphansi kwesihloko esithi “Unlimited Africa: Growing Africa’s Tourism Economy”, ogxile ekwandiseni imakethe yezokuvakasha, ukuheha abatshalizimali nokukhuthaza ukubambisana embonini.

I-Africa’s Travel Indaba kulindeleke ukuthi ihehe abahwebi, abatshalizimali  nezivakashi ezivela emazweni amaningi. Umcimbi wanamuhla ube yisinyathelo sokuqala ngaphambi komcimbi omkhulu ozoba ngesonto elizayo.