KUZOVALWA IMIGWAQO ETHEKWINI NGOMDLALO WE-ARROWS NECHIEFS

LINDOKUHLE NGCOBO

KUZOVALWA imigwaqo eThekwini ngenxa yomdlalo weBetway Premiership phakathi kweqembu, iLamontville Golden Arrows neKaizer Chiefs ozoba namuhla, ngehora lesi-17h30 ntambama eMoses Mabhida Stadium,  eThekwini.

Amaphoyisa edolobha iTheku adalule ukuthi  kuzovalwa umgwaqo uSmiso Nkwanyana ophakathi kuka-Battery Beach noSandile Thusi. 

"Abahamba ngezinyawo kuphela abazovunyelwa ukusebenzisa umgwaqo uMngeni noMasabalela Yengwa Avenue. Abahamba ngezimoto ezithutha umphakathi bazokwazi ukwehla emgwaqeni uSylvester Ntuli, Sandile Thusi nakuSomtseu," ngokusho kwesitatimendi samaphoyisa. 

Amaphoyisa eTheku aveza ukuthi indawo yokupaka izimoto ekhokhelwayo izobakhona eBadminton Hall emgwaqeni uMngeni, isePeople's Park East  naseSuncoast Casino.