KUXABENE UBENDLE EMBUTHWENI WAMAPHOYISA

LINDOKUHLE NGCOBO

KUXABANE ubendle embuthweni wamaphoyisa kumiswa iphini likaKhomishana wamaphoyisa kuleli uLit General Shadrack Sibiya. 

Lokhu kuqinisekiswe uKhomishana wamaphoyisa kuleli uGeneral Fannie Masemola namuhla ngesikhathi emukela uhlu lwezikhalazo kwimashi yokweseka uKhomishana wamaphoyisa KwaZulu-Nata(KZN) uLt General Nhlanhla Mkhwanazi. 

"Ngimnike(General Sibiya) incwadi namuhla, ngamtshela ukuthi ahlale ekhaya, athathe ikhefu lokungayi emsebenzini. Senzela ukuthi kuqhubeke uphenyo, oluzoholela ekutheni kuthathwe isinqumo uma seluphothuliwe," kubeka uGeneral Masemola. 

Lokhu kwenzeka nje uMengameli wezwe uMnuz Cyril Ramaphosa usandukumisa uNgqongqoshe wamaphoyisa uMnuz Senzo Mchunu, kulandela izinsolo ezivezwa uMkhwanazi mhlaka 6 July kulo nyaka. 

UMkhwanazi uthuse abaningi eveza ukuthi ngomhlaka 31 December 2024 uMchunu wakhipha incwadi enqume ukuthi kuhlakazwe uphiko lweTask Team eliphenya ngokubulawa kosopolitiki. Ngokusho kukaMkhwanazi, ngoJanuary, February no-April walo nyaka uSibiya wabhala incwadi ephakamisa ukuba kuhoxiswe amadokhethi amacala okubulawa kosopolitiki, ngemuva kokuvela kwamagama osopolitiki nosomabhizinisi. UMkhwanazi uthi uMchunu noSibiya bahlakaza leli thimba(Task Team) ngemuva kokuthi ligasele emzini kasomabhizinisi uVusumuzi "Cat" Matlala, obhekene necala lokuzama ukubulala. 

Wadalula(UMkhwanazi) ukuthi uBrown Mogotsi owaxhumana noMchunu ukuthi kuhlakazwe leli thimba.