KUSOLWA UMBANGO WOKUNTSHONTSHWA KWEMFUYO KUSHISWA ABANE ENANDA

AMAPHOYISA athungatha abasolwa ecaleni lokushiswa kubulawe abantu abane endaweni yaseMatata, eNanda izolo.  Kuvela ukuthi abagilwa batholakale ezimotweni ezimbili beshe bangqongqa.

Kusolakala ukuthi lesi sigameko sihlobene nombango wokuntshontshwa kwemfuyo, njengoba kutholakale izinkomo ezintathu zifile eceleni kwemoto. 

Okhulumela amaphoyisa KwaZulu-Natal(KZN) uColonel Robert Netshiunda ukuqinisekisile ukubulawa ngokushiswa kwabantu abane, abangabonakali ngenxa yokusha.

Wadalula ukuthi isidumbu soyedwa sitholakale emontweni yohlobo lweNissan NP200, kwathi izidumbu ezintathu zatholakala emontweni iToyota Rumion.

"Kutholakale izinkomo ezintathu zifile eceleni kweNP200. Okwamanje ayikaziwa imbangela yokubulawa kwabagilwa nokho amaphoyisa asola ukuthi lesi sigameko simayelana nokuntshontshwa kwemfuyo. Lusaqhubeka uphenyo lokuthola amagama abagilwa," kuchaza uNetshiunda.