KUSOLWA UBUDEDENGU KUSHONA UMFANA(14) OBESHAYELA IMOTO KWAMASHU

SEKUVELE ukuthi ingane yomfana eneminyaka engu 14 ubudala, eshonile iyona ebeyishayela ngesikhathi kuginqika imoto emgwaqeni uM25, KwaMashu izolo.

Lokhu kuqinisekiswe amaphoyisa kaMasipala weTheku namuhla. Esitatimendeni sabomthetho kuvela ukuthi  umfana ubehamba noyise wakhe, obehlezi(uyise) esihlaweni somgibeli. Kukholakala ukuthi uyise womfana ubephuze utshwala. Nokuthe ngesikhathi umfana ehamba ngemoto wahluleka ukuyilawula, yaginqika amahlandla amaningi.

"Le ngozi ebuhlungu kanje, iyisikhumbuzo sokuba budedengu emgwaqeni. Ukuvumela ingane engenazo izincwadi zokushayela ukuthi ishayele imoto emgwaqeni, ukuphuza utshwala, kubeka izimpilo zabantu abangenacala engcupheni," ngokusho kwesitatimendi samaphoyisa. 

Lokhu kwenzska nje, kule mpelasonto yePhasika, kuboshwe abashayeli abangaphezulu kwabangu 50 ngenxa yokushayela bephuze utshwala.