KUBOSHWE ABATHATHU NGOKWEBA INGQALASIZINDA YETHEKU

LINDOKUHLE NGCOBO

BASOBISHINI abasolwa abathathu ababoshwe ngoLwesine emzini oseBuffelsdraai, enyakatho neTheku. 

Abasolwa baboshwe ngemuva kokutholakala namakhebuli kagesi, izigxobo zamalambu asemgwaqeni nama-fittings, okuqinisekisiwe ukuthi kuntshontshwe kuMasipala weTheku. Nokuvele ukuthi kubiza inani lika-R100 000.

Kuvela ukuthi abasolwa abaphakathi kweminyaka engu-30 kuya kwengu-64 ubudala bebegqoke umfaniswano wokusebenza obomvu. Uphenyo lamaphoyisa luveza ukuthi abasolwa basebenzela inkampani engumgunyathi eyenza sengathi iqashwe uMasipala.

"Kuthathwe imoto ebebesebenza ngayo(Abasolwa) iNissan NP200 ebibhalwe igama elithi 'Isithebe Electrical'. Uphenyo luveza ukuthi abasolwa bayingxenye yabaxhuma ugesi ngokungekho emthethweni, badla lubi ekuntshontsheni ingqalasizinda kaMasipala," ngokusho kwesitatimendi sikaMasipala weTheku. 

Kulindeleke ukuthi abasolwa ababoshiwe bavele eNkantolo maduze.