KUBHIMBE UHLELO KWABAZAME UKUGWAZELA UMPHATHI SITESHI

AYIPHUMELELANGA imizamo yabesilisa ababili, ababoshwe ngamaphoyisa ase-Upper Tugela, eBergville izolo ngecala lonkohlakalo. Laba besilisa bebezama ukugwazela umphathi siteshi..

Kuvela ukuthi umphathi siteshi samaphoyisa ase-Upper Tugela uthole ucingo kumlisa angamazi. Lo mlisa ucele ukubona umphathi siteshi mayelana nesihlobo sakhe(umlisa) esiboshiwe ngamaphoyisa ngoLwesihlanu ebusuku, ngecala lokuba nesibhamu i-AK47 nezihlamvu ezingu-13.

Okhulumela amaphoyisa KwaZulu-Natal(KZN) uLieutenant Colonel Paul Magwaza uthi umlisa udalule ukuthi angayikhipha imali ukuze  isihlobo sakhe siphume esitokisini. 
 Umphathi siteshi ube esewuvuma lo mhlangano wabeka ukuthi awubanjelwe endaweni yaKwaDukuza Crossing. 

"Ngenxa yokuthi lo mlisa obefonile ubehlose ukuzokwenza icala, umasiteshi ube esebeka amaphoyisa kude buduze nalapho bekuzobanjelwa khona umhlangano. Nebala umlisa obefonile ehamba nomunye bafikile babe sebenikeza umphathi siteshi imali engango R12 600 ukuze akwazi ukukhipha isihlobo sabo esiboshiwe.  Bathe benikeza imali umasiteshi, amaphoyisa abe eseqhamuka ababopha," kuchaza uMagwaza. 

Kulindeleke ukuthi bobabili abasolwa ababoshiwe bavele eNkantolo yeMantshi yaseBergville ngoLwesibili mhlaka 22 December 2025.