ISEXWAYISO NGESIMO SEZULU KWAZULU-NATAL

KUNXUSWA umphakathi waKwaZulu-Natal(KZN) ukuba uqaphele imvula enamandla yesigaba sesine engahambisana nokuduma kwezulu, okulindeleke ukuthi kuhlasele ezingxenyeni zalesi sifundazwe.

Ngokusho kwezangoma zezulu iSouth Africa Weather Services(SAWS), le mvula kulindeleke ukuthi iqale kusasa ngoLwesine mhlaka 27 November. 

Izindawo ezingase zithinteke ilezi uGu, Alfred Duma, Underberg, uMzimkhulu, eMadlangeni, Endumeni, eThekwini, Greater Kokstad, Impendle, Ingwe, Inkosi Langalibalele, Msinga, Ndwedwe, Newcastle, Okhahlamba, uMvoti naseMgungundlovu.

Le mvula ingase idale umonakalo emgwaqeni, nasemzini eseduze nemifula.

Lesi sexwayiso siphuma nje, kusakhalwa ngemvula ehlasele ngeSonto edale umonakalo eMshwathi. Lapho kuthinteke izimpilo zabantu abangu-465 emzini engu-108. Kwacekeleka phansi imizi engu-117. Le mvula idlule nomphefumulo womuntu oyedwa kanti kusathungathwa abathathu abanyamalele.