IPIRATES ICACISA NGEKUSASA LIKA SALENG

LINDOKUHLE NGCOBO 

KUPHELILE ukuqagela ngekusasa likaMonnapule Saleng osemabhukwini e-Orlando Pirates. 

Lokhu kulandela ukuthi Amabhakabhaka ememezele ngokusemthethweni ukuthi lo mdlali oneminyaka engu-27 ubudala, uzobolekiswa komakoti be-Betway Premiership i-Orbit College isizini ka-2025/26 yonke. 

IPirates ishaye ngamafuphi esitatimendini esikhiphe izolo kusihlwa 

"I-Orlando Pirates ingakuqinisekisa ukuthi ifinyelele esivumelwaneni sokubolekisa uMonnapule Saleng kwi-Orbit College Fc," kubeka iPirates kwisitatimendi. 

Ibimningi imibuzo kubathandi bebhola bakuleli ngekusasa lalo mdlali owagcina ukudlala kumaBhakabhaka ngoDecember 2024. Kuke kwabasalala izindaba zokuthi uzochithwa kuleli qembu laseSoweto ngoba engeneme ngeholo lakhe (Saleng). 

Khonamanjalo Amabhakabhaka adedele uNdabakayithethwa Ndlondlo oneminyaka engu-28 ubudala. Leli qembu lifisele lo mdlali ikusasa elihle lambonga ngokuhle akwenzile. 

Njengamanje iPirates iseSpain yenza amalungiselelo esizini ezayo.