INGQAYIZIVELE YETHUBA KOSOMABHIZINISI ABANCANE

OSOMABHIZINISI abancane bazothola ithuba lokufundiswa ngolwazi  lokudayisa imikhiqizo yabo kubathengisi abakhulu, emcimbini iThe Billionaire Business Expo & Awards.

Lokhu kuvele namuhla ngesikhathi kwethulwa ngokusemthethweni izinhlelo zalo mcimbi, esithangamini sabezindaba esise-Ugu Sports Leisure Centre, ePort Shepstone. 

Ekhuluma uNksz Lungile Mbili wenkampani uMlando Creatives ehlela lo mcimbi ngokubambisana noMasipala waseRay Nkonyeni, uthi kumele kuvalwe igebe phakathi kosomabhizinisi abancane nabathengisi. 

"Ngalo mcimbi sithi osomabhizinisi abeze bezofunda, abathengisi bazobe bekhona. Osomabhizinisi bazothola ithuba lokuveza izinto abadinga ukuzazi ngoba ulwazi lubalulekile," kubeka uMbili. 

Kuphinde kwamenyezelwa umcimbi wezindondo, okuqokwe kuwo osomabhizinisi abangu-60, ezigabeni ezingu-20. 

Lo mcimbi osubuya inhlandla lesithupha kulo nyaka, uzoba ngomhlaka 4 December kule ndawo owethulwe kuyo namuhla.