EZIBUHLUNGU KUBALANDELI BE NATAL RICH BOYZ

LINDOKUHLE NGCOBO 

IRICHARDS Bay FC ngeke isawudlalela eMhlathuze Sport Complex, eRichards Bay umdlalo wayo wokuvula iBetway Premiership neMarumo Gallants ngoMgqibelo.

Kuvela ukuthi le nkundla esandukuvulwa ngokusemthethweni ayikho esimeni esifanele. Lokhu kuqinisekiswe iNatal Rich Boyz namuhla. Leli qembu likaSifiso "Jomo" Biyela  liveze ukuthi le nkundla yayo yasekhaya ebizodlala kuyona okokuqala selokhu yanyuselwa esigabeni esiphezulu, iphazamisekile ngenxa yemidlalo yeKZN Premier’s Cup ngenyanga edlule.

"UMasipala waseMhlathuze usuqalile ukulungisa umonakalo, uzokwenza  isiqiniseko sokuthi kufika usuku lomdlalo wasekhaya wesibili kuwo esizobhekana neChippa United ngomhlaka 26 August 2025, inkundla isilungile," ngokusho kwesitatimendi seBay.

Leli qembu libe selixolisa kubalandeli balo abebekade bewulindele ngabomvu lo mdlalo.