BEBEFUNELWA UKUGEBENGA IMOTO YEMALI ABADUTSHULWE EMTSHEZI

SEKUVELE ukuthi bebefunelwa ukubamba inkunzi imoto yemali, abasolwa abathathu abadutshulwe ngamaphoyisa bafa eMtshezi namuhla ekuseni. 

Abakwasidlodlo bebelandela umkhondo ngemoto yabasolwa ebihamba emgwaqeni uR74 phakathi  kwaseMtshezi naseColenso. Amaphoyisa abone imoto yohlobo lweChevrolet ebihamba ngesivinini esiphezulu maqede azama ukuyimisa, nokho abasolwa laba bavulela ngenhlamvu bebhekise emaphoyiseni. 

Amaphoyisa aphindisele ngenhlamvu kwase kwalandela ukudubulana. Ngemuva kwesigameko sokudubulana, abasolwa abathathu bafe endaweni yesigameko. Kwathi umsolwa wesine wabaleka enamanxeba okudutshulwa.

Abomthetho baveza ukuthi bathole izibhamu ezingekho emthethweni nezinhlamvu emotweni yabasolwa.