BAZONGCWATSHWA WUMNYANGO WEZOKUTHUTHA ABASHONE KU-R66

LINDOKUHLE NGCOBO 

UMNYANGO wezokuThutha KwaZulu-Natal(KZN) uzongcwaba amalungu omndeni amahlanu adlule emhlabeni engozini enyantisa igazi eyenzeke kuR66, eGingindlovu ngeSonto ebusuku. 

Lokhu kuqinisekiswe uNgqongqoshe walo Mnyango uMnuz Siboniso Duma, uveze ukuthi umngcwabo wamalungu omndeni waKwaNtombela uzoba ngoMgqibelo,  eMjibha Sports Fields, Olundi.

Kulandela ukuthi izolo umndeni ukwazile ukuyokhomba imizimba yamalungu ayo ashonile emakhazeni aseShowe. Lo mndeni ongokudabula endaweni yaKwaMjibha, Olundi ulungiselela ukungcwaba uNksz Makhosi Ntombela(60), Nksz Thuli Dlamini(42), Sipho Zungu (6), Abenathi Ntombela obenezinyanga ezingu-9 noMnuz kaserol Michael (ongumkhwenyana waKwaNtombela).

Laba badlule emhlabeni ngesikhathi imoto iHyundai Grand i10 ebebehamba ngayo ishayiswa iveni iFord Ranger LDV.