BADELE IMVULA NAMAKHAZA BAYOJABULA KWI DUNDEE JULY

LINDOKUHLE NGCOBO 

ABANTU baKwaZulu-Natal(KZN) badele imvula namakhaza bayobungaza iminyaka engu-20 yomcimbi womjaho wamahhashi iDundee July, enkundleni iDundee Traditional Horse Riding Track, eDundee izolo. 

Lo mjaho ohlelwa uMnyango wezeMidlalo, ubuCiko namaSiko eKZN oholwa uNgqongqoshe Mntomuhle Khawula, ulokhu ukhula ngamandla unyaka nonyaka. 

Kulo mcimbi umphakathi awugcinanga ngokuthokozela umtelebhelo wamahhashi kuphela, uthole ithuba lokubuka ingqephu namaciko abenandisa.

UNgqongoshe uKhawula  umemezele ngokumsethethweni ukuthi umjaho omkhulu uqanjwe  ngoMnuz Michael "Mike" Mthembu obengomunye wabahleli balo mjaho  ongasekho emhlabeni, ngenhloso yokumhlonipha(UMthembu). 

Lo mjaho obubhekwe ngabomvu unqotshwe ihhashi, Impendulo wesiFunda Amajuba, ogitshelwa uZakhele Mkhabela, okhale wemuka nemali engu-R400 000, Ihhashi, uMoses waseMpumalanga ulale isibili wathola umklomelo ka-R100 000, Ihhashi, Amazondo wesifunda Amajuba ophume endaweni yesithathu uthole umklomelo ka-R70 000.

Ekhuluma uNdunankulu waseKZN uMnuz Thamsanqa Ntuli ubonge  umndeni wakwaMthembu obuhambele lo mjaho. Wancoma amagalelo kaMthembu kwezokuhlela umjaho wamahhashi.

"Siyathokoza ukuthi lo mjaho uyakhula ngaso sonke isikhathi. Okusemqoka kubantu baseDundee namaphethelo ukuthi kufuneka izinhlelo ezizokwenza iDundee ithuthuke. 

IDundee ayibe nezinhlelo ezikwazi ukunxenxa izivakashi.

 Manje njengoba kuthiwa nezindawo zokulala ziyaphela kusho ukuthi kufuneka iDundee ikucabange ukuthi siyazidinga izindawo zokulala lapha.

 Ukuze kuthi uma kunomcimbi abantu bengahambi amabanga amade. Siyazi ukuthi koNewcastle, Mnambithi naseNquthu nakhona kugcwele," kubeka uNtuli.